NewsUz.Com. Shifokorlar, iqtisodchilar, o‘qituvchilar va huquqshunoslik kasbi egalari O'zbekistondagi eng obro‘li kasblar sanaladi. "Ijtimoiy fikr" jamoatchilik fikrini o‘rganish markazi o‘tkazgan so‘rovda mazkur holat qayd etilgan. Markaz tarqatgan xabarga ko‘ra, so‘rovda ishtirok etganlarning 67%i shifokorlar, 49,6%i pedagoglar, 35,2%i iqtisodchilar, 26%i huquqshunoslarni eng yaxshi kasb egalari deb baholagan.

NewsUz.Com. "O'zbekiston bahoiylari" diniy guruhi rahbari Sepexer Toxiriy missionerlik faoliyati bilan shug‘ullangani uchun mamlakatdan chiqarib yuborildi. Mahalliy matbuot xabariga ko‘ra, asli eronlik bo‘lgan Tohiriy Buyuk Britaniya fuqaroligini olgan, 1990 yildan buyon O'zbekistonda faoliyat yuritgan. Bu yerda qonuniy yashab turish uchun O'zbekiston fuqarosiga uylangan.

NewsUz.Com. O'zbekiston Monopoliyaga qarshi kurash, raqobat va tadbirkorlikni qo‘llab-quvvatlash davlat qo‘mitasi «Solvay Pharma» farmatsevtika kompaniyasiga nisbatan ish ochgan. Dori-darmon kompaniyasi reklama va monopoliya qonunchiligini buzishda ayblangan. Qo‘mita tarqatgan xabarga ko‘ra,  «Solvay Pharma»  o‘zi ishlab chiqargan grippga qarshi «Inflyuvak» vaktsinasi haqidagi ma'lumotda uni boshqa kompaniyalar ishlab chiqargan davo vositalaridan mutlaqo afzal deya xulosa bergan.  

NewsUz.Com. 1 fevraldan Toshkent shahar aholisi uchun markaziy isitish tizimi, issiq va sovuq suv uchun to‘lovlar 20 foizga oshiriladi. Gazeta.uzning «Toshissiqenergo» va «Suvsoz» tashkilotlariga tayanib xabar berishicha, narx oshishi energetika va boshqa resurslar bahosining ko‘tarilib ketgani bilan bog‘liq. Oylik isitish to‘lovi bir kvadrat metrga 300,2 so‘mdan 365,8 so‘mga ko‘tariladi.

NewsUz.Com. 24 yanvar soat 0:20da Toshkentda zilzila ro‘y berdi. Toshkent seysmologiya markazi tarqatgan xabarga ko‘ra, yer silkinishi 12 ballik shkala bo‘yicha 3-3,5 ballni tashkil etgan. Zilzila markazi Toshkentning o‘zida bo‘lgan. Yer silkinishi natijasida shahardagi avtomobillar signalizatsiyalari ishlab ketgan, aholi orasida qurbonlar bo‘lmagan. Farg‘ona vodiysi va Toshkent seymologik jihatdan o‘rta darajadagi xavfli hududlar sirasiga kiradi.

NewsUz.Com. O'zbekiston hukumati Respublika ob-havo markazi (O'zgidromet) rahbari, geografiya fanlari doktori, professor Viktor Chubni Jahon meteorologiya tashkiloti prezidentligiga nomzod sifatida ilgari surdi. O'zgidromet matbuot markazi tarqatgan xabarga ko‘ra, Jahon meteorologiya tashkiloti 2011 yil mayda Jenevada o‘tkazadigan XVI Kongressida tashkilot rahbarini saylash ko‘zda tutilgan.

NewsUz.Com. O'zbekistonda pirotexnika vositalari savdosi bilan shug‘ullanish uchun litsenziya tartibi joriy etiladi. Vazirlar Mahkamasining 331-qarori bilan tasdiqlangan hukumatning 2010 yildagi qonunchilik rejasiga ko‘ra, bu to‘g‘ridagi qonun loyihasi fevral oyidagi Qonunchilik palatasiga taqdim qilinadi. Shuningdek, mamlakat hukumati rejasiga ko‘ra, pirotexnika vositalarining noqonuniy savdosiga qarshi javobgarlikni qat'iylashtiruvchi qonun loyihasi tayyorlanadi.

NewsUz.Com. Ummon sultonligi O'zbekiston poytaxti Toshkentda o‘z diplomatik vakolatxonasi ochadi. UzDaily.uz xabariga ko‘ra, Ummon sultoni Qobun bin Said bu to‘g‘rida farmon imzolagan. Toshkentda arab davlatining elchixonasini ochish masalasi 2009 yilning oktyabrida O'zbekiston rahbari mazkur davlatga rasmiy tashrif bilan borgan ko‘tarilgandi. Ummon Fors ko‘rfazida joylashgan davlat.

NewsUz.Com. 7 yanvar kuni Toshkent aeroportida bojxona tekshiruvi chog‘ida Isroil fuqarosi Tamara Yakudaevaning yuki orasidan 12 dona 5.56 mm kalibrli patron va M-16 avtomatik vintovkasining bir dona magazini topilgan. 1988 yilda tug‘ilgan T.Yagudaeva charter reysda Tel-Aviv-Toshkent-Bangkok yo‘nalishida uchib kelayotgandi. Gumondor sifatida hibsga olingan T.Yagudaeva avval O‘zbekiston fuqarosi bo‘lgan, Samarqandda yashagan.