NewsUz.Com. O‘zbekiston prezidenti sayloviga sanoqli kunlar qolganda Markaziy saylov komissiyasi «Ezgulik» inson huquqlari jamiyatiga kuzatuvchi mandatini berishni rad etdi. Markaziy saylov komissiyasi raisining o‘rinbosari Qo‘chqor Tog‘aev nomidan berilgan javob maktubida O‘zbekiston prezidenti saylovida adliya vazirligi tomonidan ro‘yxatga olingan siyosiy partiya, tashabbuskor guruh va xalqaro tashkilotlar vakillari kuzatuvchi sifatida ishtirok etishi mumkinligi aytilgan.

"O‘zbekiston prezidenti saylovi to‘g‘risida"gi qonunning beshinchi moddasida: "Saylovga tayyorgarlik ko‘rish va uni o‘tkazishga doir barcha tadbirlarda, shuningdek, har bir saylov uchastkasida saylov kuni ovoz berish xonalarida va ovozlarni sanab chiqishda O‘zbekiston Respublikasi prezidentligiga nomzodlar ko‘rsatgan siyosiy partiyalardan, saylovchilar tashabbuskor guruhlaridan bittadan kuzatuvchi... qatnashish huquqiga egadir", deyilgan. MSK rahbari o‘rinbosari o‘z maktubida kuzatuvchi guvohnomasini bermaslik asosi sifatida ana shu moddada tilga olingan "ro‘yxatga olinganlik" talabini ko‘rsatadi. 

«Ezgulik» jamiyati vakili tashkilot adliya vazirligida rasman ro‘yxatdan o‘tgani, saylov komissiyasining hattoki ana shu elementar ma'lumotdan ham bexabar ekanidan hayratini izhor qildi. Shu bilan birga jamiyat vakili saylovchilarning qonuniy manfaatlarini himoya qilish ularning asosiy vazifalaridan ekanini ham ta'kidladi.

«Aftidan, Markaziy saylov komissiyasi raisi o‘rinbosari Qo‘chqor Tog‘aev adliya vazirligi tomonidan tasdiqlangan nizom bo‘yicha mamlakat fuqarolari haq-huquqlarini, щu jumladan, saylov huquqini himoya qilishni asosiy maqsadi deb belgilagan tashkilotimiz xususida yaxshi xabardor emas, shekilli. Saylov jarayonida kuzatuvchi sifatida ishtirok etish aynan saylovchining huquqlariga nechog‘lik rioya etilayotganini ko‘rish va baholash imkonini bermog‘i lozim edi», - deyiladi «Ezgulik» bayonotida.

Markaziy saylov komissiyasi kabi nufuzli idoraning mavjud vaziyatni to‘liq o‘rganmasdan xulosa bergani, asossiz "asos"ga tayanib "Ezgulik" so‘rovini rad etgani jamiyatni mamnun etgani yo‘q, albatta. Boz ustiga, saylov komissiyasi rad etish to‘g‘risidagi bildiruvni saylovga sanoqli kunlar qolganda oshkor qildi. Ya'ni hozirgi holatda "Ezgulik" jamiyati o‘z huquqini sud orqali talab qilish imkoniga ham ega emas. Vaziyatni o‘zgartirish uchun sudlashib yurtgunga qadar saylov o‘tib ketadi.