NewsUz.Com. Amerikaning Guantanamo qamoqxonasida saqlangan o‘zbekistonlik mahbus Shveytsariyaga yuborildi. Bu haqda Reuters agentligi Amerika adliya vazirligiga tayanib xabar beradi. Avval xabar berganimizdek, 2009 yil dekabrda Shveytsariya Federal kengashi ismi oshkor etilmayotgan o‘zbekistonlikka boshpana berishga roziligini bildirgandi. Bu esa Shveytsariyada munozaralarga ham sabab bo‘lgandi.

Amerika Prezidenti Barak Obama hokimiyatga kelganidan keyin keskin tanqidlarga sabab bo‘lib kelayotgan Guantanamo mahbusxonasini yopishga qaror qildi va u yerda aybsiz saqlangan mahbuslarni qabul qilish borasida dunyo davlatlariga murojaat qildi. Joriy yilning fevralida Yevropa Ittifoqi ichki ishlar vazirlari majlisida Ittifoq davlatlarining mahbuslarni qabul qilish imkoniyati muhokama etildi va bu boradagi qarorni har bir davlat o‘zi qabul qilishiga kelishildi. Shu tariqa ellikka yaqin mahbusdan to‘rt nafari Yevropa davlatlari (Fransiya, Vengriya, Italiya)dan boshpana oldi.

Shveytsariya ham garchi Ittifoqqa a'zo bo‘lmasada, mahbuslarni qabul qilishda ishtirok etish niyatini bildirdi. Ammo konfederatsiya tartibidagi boshqaruvga asoslangan davlatda bu tashabbusni faqatgina Jeneva kantoni hukumati ma'qulladi, Bazel, Turgau, Friburg kabi yirik shaharlar esa bunga qo‘shilmagan.

Avvalroq Irlandiya hukumati Guantanamo qamoqxonasida saqlanib kelgan ikki nafar O'zbekiston fuqarosiga boshpana berishga rozi bo‘lgandi.