NewsUz.Com. O'zbekiston Monopoliyaga qarshi kurash, raqobat va tadbirkorlikni qo‘llab-quvvatlash davlat qo‘mitasi «Solvay Pharma» farmatsevtika kompaniyasiga nisbatan ish ochgan. Dori-darmon kompaniyasi reklama va monopoliya qonunchiligini buzishda ayblangan. Qo‘mita tarqatgan xabarga ko‘ra,  «Solvay Pharma»  o‘zi ishlab chiqargan grippga qarshi «Inflyuvak» vaktsinasi haqidagi ma'lumotda uni boshqa kompaniyalar ishlab chiqargan davo vositalaridan mutlaqo afzal deya xulosa bergan.  

Qo‘mitaga ko‘ra, bu dori bozoridagi boshqa kompaniyalar bilan halol raqobat qoidasiga ziddir.

Ma'lum bo‘lishicha, O'zbekistonda «GlaxoSmithKline Export Limited» kompaniya ishlab chiqargan grippga qarshi «Flyuariks» vaktsinasi ham sotiladi. Shu munosabat bilan  «Solvay Pharma» kompaniyasiga ogohlantirish xati yuborilgan. O'zbekistonda 1999 yili o‘z vakolatxonasini ochgan, bosh qarorgohi Belgiyada joylashgan kompaniya respublikadagi beshta yirik farmatsevtika ishlab chiqaruvchilaridan biri sanaladi.

Avvalroq Monopoliyaga qarshi kurash qo‘mitasi O'zbekistondagi 267ta dorixona faoliyati tekshiruvi bo‘yicha tahlillarni e'lon qilgandi. Unga ko‘ra, ayrim dorixonalarda yaroqlilik muddati o‘tib ketgan va aholi sog‘ligiga jiddiy zarar yetkazishi mumkin qalbaki dori-vositalari sotilayotganligi aniqlangan.