NewsUz.Com. Tojikiston hukumati Rog‘un GESi masalasini O'zbekiston bilan muhokama qilish uchun Dushanbeda o‘zbek delegatsiyasini qabul qilishga tayyor. Bu haqda Tojikiston bosh vaziri Oqil Oqilovning O'zbekiston bosh vaziri Shavkat Mirziyoevga yozgan javob xatida ma'lum qilingan. «Xovar» rasmiy agentligi tarqatgan javob xatida O.Oqilov Tojikistonning Rog‘un borasidagi pozitsiyasini o‘zgarmasligini bildirgan.

Shuningdek, u Rog‘un suv omborini to‘ldirish uchun olinayotgan suv 15 yil davomida yig‘ilgan va Tojikistonga tegishli limit ekanini bildirgan. Tojikiston bosh vaziri mazkur loyihaning mintaqadagi insonlar hayotiga salbiy ta'sir qilishi mumkinligini rad etgan.

Avval xabar berganimizdek, 2010 yilning 3 fevralida O'zbekiston hukumati rahbari tojikistonlik hamkasbiga Rog‘un GESi qurilishi masalasida rasmiy xat yo‘llagandi.

"O'zbekiston Respublikasining mazkur masala yuzasidan qat'iy pozitsiyasi Rog‘un GES qurilishini qayta boshlashdan avval loyihani detalma-detal mustaqil ekspertizadan o‘tkazishdan iborat. Negaki, mazkur loyiha bundan 40 yil oldin eskirgan loyihaviy, konstruktorlik va texnologik qarorlar asosida ishlab chiqilgan", deyiladi bosh vazir maktubida.

Maktubda mazkur loyiha Orol fojiasi oqibatida mintiqada yuzaga kelgan ekologik tang vaziyatga, Amudaryo suvining oqimi va hajmiga ta'sir qilishi mumkinligi qayd etilgan. Mintaqadagi cho‘l hududida yashovchi aholining suv bilan bog‘liq ehtiyoji esa shunga bog‘liq.

Shu bilan birga, Rog‘un loyihasining texnogen fojialardan himoyalanmagani ham ta'kidlanadi.