NewsUz.Com. Jinoyat ishlari bo‘yicha Toshkent shahar Mirobod tuman sudi taniqli fotograf Umida Ahmedovani tuhmat va haqorat bilan bog‘liq jinoyatarda aybdor deb topdi, ammo jazodan ozod qildi. BBC tarqatgan xabarga ko‘ra, U. Ahmedovaning uch farzandning onasi ekanligi, o‘z sohasida qilgan ishini inobatga olib, u avf etilgan. Uning o‘zi sudning "aybdor" deb topgan qarori yuzasidan shikoyat yozishini aytgan.

Eslatib o‘tamiz, Umida Ahmedova Shveytsariya elchixonasining gender dasturi doirasida chiqargan to‘plam va filmlari sababli jinoiy ishga jalb etilgan. Xususan, u 2007 yili elchixona dasturi doirasida "Ayollar va erkaklar: subhdan shomga qadar" deb atalgan fotoalbom chop ettirgan. Mazkur to‘plamdan O'zbekistonning turli hududlarida yashovchi insonlar hayoti aks etgan 110ga yaqin surat o‘rin olgan. O'zbekiston Matbuot va axborot agentligi Umida Ahmedova o‘z fotosuratlari orqali o‘zbek xalqiga tuhmat va haqorat qilgan degan xulosaga kelgan va bu haqda ichki ishlar idorasiga taqdimnoma kiritgan. Shu asosda Mirobod tumani ichki ishlar boshqarmasi Umida Ahmedovaga nisbatan Jinoyat kodeksining 139- (tuhmat) va 140- (haqorat) moddalari bo‘yicha ish ochgan.

Mazkur voqea munosabati bilan O'zbekiston, Rossiya, Kanada, Amerika va Yevropa mamlakatlarilik fotograf, rassom va san'atshunoslar O'zbekiston Tashqi ishlar va Ichki ishlar vazirliklariga murojaat bilan chiqqan. Mazkur murojaatda Umida Ahmedovaning ishlarida o‘zbek xalqiga tuhmat va haqorat yo‘qligi, ijod erkinligini hurmat qilish joizligi eslatilgan.