O‘zbekiston BMTning Bolalar huquqlari to‘g‘risidagi Konventsiyasini imzolagan. Milliy qonunchilikni mazkur Konventsiya talabiga moslashtirish uchun qator chora-tadbirlar ko‘rilgan. Lekin xalqaro hamjamiyatning qayta-qayta talablariga qaramasdan O‘zbekistonda haligacha bolalar huquqlari kafolatlari hamda, yuvenal sudlov bo‘yicha qonun qabul qilinmagan. Ishlab chiqilayotgan qonunlarning ijro etilishi masalasi alohida mavzu. Lekin kerak bo‘lsa, kasanachilik to‘g‘risida alohida qonun hujjati qabul qilingan bir paytda bolalar huquqlari kabi o‘ta muhim masalaning e'tibordagn chetda qolishi qiziq. 

Ma'lum bo‘lishicha, ayni paytda O‘zbekiston parlamenti bolakaylarning huquqlarini kafolatlash uchun qonun loyihasi ustida ish olib bormoqda ekan. Xalqda hech bo‘lmagandan kech bo‘lgani yaxshi degan optimistik ruh bilan sug‘orilgan yaxshi naql bor. Parlament tomonidan kechikibroq bo‘lsayam, ushbu dolzarb masalaga doir qonunning ishlanishini faqat olqishlash mumkin. Harqalay, yangi qonun dalalarda paxta terayotgan o‘quvchilar huquqini himoya qilishi ehtimoli yo‘q emas.