NewsUz.Com. Shveytsariyaning Jeneva shahrida Birlashgan Millatlar Tashkiloti qiynoqlar qo‘mitasi 39-sessiyasi yakunlandi. Yig‘inda BMT O‘zbekistondagi inson huquqlari borasidagi ahvoldan xavotir bildirgan.

Anjumanda Portugaliya, Norvegiya, Latviya, Estoniya va Benin kabi davlatlar qatori O‘zbekistondagi qiynoqlar bilan holat ham muhokama etildi.

BMTning qiynoqlar bo‘yicha qo‘mitasining bu galgi xulosasi salbiy xarakterga ega. Qo‘mita o‘zbek huquq idoralari tomonidan qiynoqlar, insoniylikka zid munosabatda muntazam sur'atda qo‘llanayotgani, BMT Konventsiyasi talablari bajarilmayotganidan tashvish izhor etgan.

Tashkilotning qiynoqlarga qarshi maxsus Konventsiyasi 1984 yili qabul qilingan. Mazkur hujjatni 145 davlat, jumladan, O‘zbekiston ham ratifikatsiya qilgan.

O‘n nafar mustaqil ekspertlardan tashkil topgan ushbu qo‘mita har to‘rt yilda bir marotaba a'zo davlatlarning qiynoqlarga qarshi Konventsiyani qanday bajarayotganini tahlil qiladi.

Qo‘mita ekspertlari O‘zbekistonda politsiya va turma xodimlari qiynoqlardan doimiy sur'atda foydalanishlarini qayd etgan. Bu borada tekshiruvlar o‘tkazish, noinsoniy munosabatlarga yo‘l qo‘yganlarni jazolash talablari esa tabiiy ravishda e'tiborsiz qoldirilgan. Qiynoqlar va noinsoniy munosabatlar xususan,
tergov va surishtiruv davrida avj olishi ta'kidlangan.
Xalqaro tashkilot mamlakat rahbariyatini Konventsiya talablarini to‘la bajarishga chaqirgan.
Hozirga qadar inson huquqlari borasidagi salbiy vaziyat vajidan O‘zbekiston hukumati tanqid qilib kelinadi. Lekin xalqaro tashkilotlarning achchiq fikrlari shu paytga qadar tan olinmagan. Faqat rad etilgan.
Jahon davlatlarini muvofiqlashtiruvchi vazifasini bajarishga urinayotgan BMT 2006 yili mustaqil ekspertlarning qamoqxonalarga kirishi huquqini beradigan protokol ham qabul qilgan. Biroq butun boshli Kontsentsiya tan olinmayotgan bir paytda qo‘shimcha protokol talabining bajarilmayotganini takrorlab o‘tirmasa ham bo‘ladi.