NewsUz.Com. O‘zbekistondagi ijtimoiy holat Yevropadagi biznes va tijorat faoliyatiga ham ta'sir ko‘rsatdi. Finlyandiyaning Marimekko kompaniyasi bolalar huquqlarini himoya qilish vajidan Kreenholm shirkatidan to‘qimachilik mahsulotlarini sotib olishni to‘xtatdi. Taxminlarga qaraganda, Estoniyaning Kreenholm shirkati o‘z to‘qimachilik to‘qimachilik mahsulotlarini ishlab chiqarishda bolalar mehnatidan majburiy foydalangan holda terilgan O‘zbekiston paxtadan foydalanmoqda. 

Shu hafta Finlyandiyaning Nelsingin Sanomat gazetasida ayni shu mavzudagi maqola chop etilgan. Mazkur maqolada Boras Wafveri biznes guruhiga kiruvchi Kreenholm kompaniyasi bolalarni majburlab ishlatish evaziga terilgan paxtadan foydalanayotgani tilga olingan .

Shvetsiyaning SVT kanali ham o‘zbekistonlik maktab bolalari o‘qish o‘rniga paxtaga haydalayotgani to‘g‘risida hujjatli film ko‘rsatgan. Filmda aytilishicha, Yevropada yuqori savdo markalari sifatida tilga tushgan H&M, Boras Wafveri kabi kiyim-kechak mahsulotlari ana shu paxtadan tayyorlanadi.

Kreenholm shirkatining rahbari Matti Xaarayoki ular paxtani vositachilardan sotib olishlari, shu bois kompaniya chiqarayotgan mahsulotlarda haqiqatan ham o‘zbek paxtasidan foydalanilgani aniq emasligini ma'lum qilar ekan, bolalar mehnatidan majburiy foydalanishni keskin tanqid qilgan.

Endilikda Kreenholm shirkati paxtaning kelib chiqish manbasini o‘rganishga kirishdi. To‘xtab qolgan oldi-sotdilarning yana qaytadan yo‘lga qo‘yilishi tekshiruv natijalariga bog‘liq.