NewsUz.Com. O‘zbekiston inson huquqlarini himoya qilish ittifoqi faollari 8 dekabr Konstitutsiyasi kuni mamlakat bosh prokuraturasi binosi qarshisida tinch namoyish o‘tkazdilar. Namoyishchilar qo‘llaridan tutgan plakatlarda O‘zbekiston Konstitutsiyasining kattalashtirilgan tasviri va asosiy qonunni himoya qilish va hurmatlash to‘g‘risidagi da'vatlarni ko‘rish mumkin edi.

Shu bilan birga piket ishtirokchilari mamlakatdagi siyosiy mahbuslarga ozodlikka chiqarishni ham talab qilganlar.

Piket ishtirokchilarining ma'lum qilishicha, namoyish tinch holatda o‘tgan. Bu gal namoyish o‘tayotgan joyga yetib kelgan huquqni muhofaza qilish idoralari xodimlari ham o‘zlarini osoyishta va xotirjam tutganlar. Inson huquqlari himoyachisi Axtam Shoymardonovning ma'lum qilishicha, namoyish organ xodimlari tomonidan s'yomka qilingan. Lekin namoyishchilarga qarshi hech qanday qarshi harakat qilinmagan.

Odatda O‘zbekistonda inson huquqlari himoyachilari tomonidan o‘tkaziladigan namoyish va piketlar organ xodimlari tomonidan majburan tarqatib yuborilar va aktsiya tashkilotchilariga qarshi majburiy ta'sir choralari ko‘rilar edi. Bu gal Konstitutsiya kuni o‘tkazilgan piket birinchi marta haqorat, zo‘ravonliklarsiz, tinch holatda o‘tdi. Namoyish tashkilotchilari tomonidan bu holat yaqinlashib kelayotgan saylov bilan izohlangan.