Turkiyada bo'lgan o'zbekistonliklarga xavf haqida ogohlantirildi.

Turkiyada bo'lgan O'zbekiston fuqarolari turli jinoyat guruhlaridan keladigan xavf haqida ogohlantirildi. O'zbekistonning Bosh konsulligi fuqarolarni bunday guruhlarga ishonmaslikka va Turkiya qonunlarini buzmaslikka chaqirmoqda.

Istanbuldagi Bosh konsullik so'nggi paytlarda ba'zi jinoyat guruhlari O'zbekiston fuqarolariga katta pul mukofotlari va'da qilib, ularni noqonuniy migrantlarni Evropa Ittifoqiga, asosan Gretsiyaga, olib o'tishda vositachilik qilish uchun foydalanmoqchi ekanligini ma'lum qildi.

Hozirda bunday noqonuniy faoliyatda ishtirok etayotgan fuqarolar Turkiya qonunlariga muvofiq jazolanmoqda va uzoq muddatli qamoq jazosi bilan yuzlashmoqda.

Shuni ta'kidlash joizki, so'nggi yillarda Yevropa davlatlari noqonuniy migrantlarga qarshi faol kurash olib bormoqda. Xususan, mamlakatlar nazoratni kuchaytirib, jazoni qattiqlashtirmoqda.