Shavkat Mirziyoyev 14-fevralda yoshlar bandligini qo'llab-quvvatlash bo'yicha yangi chora-tadbirlarni belgilovchi qarorni imzoladi. Bu haqda Adliya vazirligining huquqiy axborot kanali ma'lum qildi.
Hujjat, o'sha kunda prezident tomonidan yoshlar bilan muloqot davomida e'lon qilingan qadamlarni mustahkamlab qo'yadi. Yosh tadbirkorlarni qo'llab-quvvatlash fondi Yoshlar ishlari agentligi huzurida davlat maqsadli fondiga aylantiriladi.
Fondga $100 mln miqdorida mablag' ajratiladi. Asosiy ko'rsatkich sifatida 50 mingdan ortiq yosh o'zbeklarni ish bilan ta'minlash va biznesga jalb etish maqsadi belgilangan.
O'z biznesini ochmoqchi bo'lgan fuqarolarga fond mablag'lari hisobidan 2,5 milliard so'mgacha imtiyozli kreditlar taqdim etiladi. Savdo-sanoat palatasi va hokimiyatlar har chorakda yuqori qo'shilgan qiymat yaratadigan loyihalarni moliyalashtirish bo'yicha takliflar kiritishi kerak bo'ladi.
Shuningdek, fond huzurida istiqbolli startaplarni qo'llab-quvvatlash uchun venchur tuzilmasi tashkil etiladi. Ushbu fondga Yoshlar ishlari agentligi mablag'laridan $10 mln ajratiladi.
Venchur fondi inkubatsiyadan va aktseleratsiyadan o'tgan, shuningdek, maxsus tanlovlarda g'olib bo'lgan startap loyihalariga ulushli investitsiya taklif etadi. Investitsiya miqdori startapning joriy bosqichiga qarab belgilanadi:
- yuqori muvaffaqiyat potentsialiga ega tipik modelni ishlab chiqish — 500 mln so'mgacha;
- O'zbekiston bozorida joriy etilayotgan tayyor mahsulot (xizmat) — 1 milliard so'm;
- eksport potentsialiga ega tayyor mahsulot (xizmat) — 2 milliard so'mgacha.
Bundan tashqari, daryolar, kanallar va boshqa suv havzalari bo'yida joylashgan maydonlar onlayn-auksionlarga qo'yiladi. Ular dam olish zonalari, xizmat ko'rsatish va ko'ngilochar ob'ektlar joylashtiriladi.
Avvalroq Spot $40 mln miqdorida United Ventures venchur fondining yetti davlat banki ishtirokida tashkil etilishi haqida yozgan edi.